لاول مره علي البلوجات العربيه الجزء الاول من نظريه ليه النظريه دي قائمه علي نظريه فلسفيه تانيه بتقول ان كل حاجه ليها سبب وانا قدرت افند النظريه الفلسفيه دي علشان عندنا في مصر كل حاجه اصلا من غير سبب وده تحدي للي هيعرف يجاوب علي 5 اسئله من دول هيبقي ليه عليا حكم لازم انفذه حتي لو كان اني ابطل اشجع الزمالك او ابطل اسمع فيروز نبدا
1-ليه اي حد بيقرا كتاب او جورنال في المواصلات لازم تلاقي اللي جنبه حاطط وشه معاه واحتمال يقوله ثواني استني مخلصتش الصفحه دي متقلبش ؟
2-ليه كل الدكاتره او اللي درسوا طب مقتنعين انهم وهبوا حياتهم للعلم ومعندهمش وقت للمشاعر التافهه بتاع الشباب المراهق دي في حين انهم اصلا مبيعرفوش يعملوا حاجه غير العلم ولو كانوا بيعرفوا كانوا عملوها من زمان ؟
3-ليه لما حد بيقولك عامل ايه بتقوله كويس مع انك ولا بتبقي كويس ولا نيله وبتبقي زهقان من عيشتك وعايز تنتحر ؟
3-طيب سؤال محير ليه لما تكلم حد علي تليفون البيت بتساله بقلب جامد وتقوله انت فين دلوقتي يا عم ؟
4-ليه الاهلي بيكسب علي طول في اسوا ظروفه والزمالك بيخسر علي طول في احسن ظروفه؟
5-طيب ليه في كل افلامنا العربي البطل مينفعش يموت ولازم يتجوز البطله او يبوسها مع تتر النهايه؟
6-ليه مهما نمنا كتير وحد يصحينا بنقوله استني 5 دقايق كمان؟
7-ليه كل المدخنين بيقولو نفسي ابطل سجاير بقي في نفس اللحظه اللي بيولعوا فيها السيجاره؟
8-ليه دايما المدخنين معتقدين ان فيه سيجاره نضيفه وسيجاره لا يعني النضيفه دي الدخان بتاعها صحي ومفيد مثلا؟
9-طيب السؤال ده اللي هيجاوبه ليه جايزه خاصه ليه كل سواقين الميكروباص اجتمعوا علي حب مصطفي كامل ؟؟الجايزه هتبقي مجموعه الاعمال الكامله لمصطفي كامل
10-ليه كل البنات بتكدب وتقول انا عمري ما دخلت مطبخ ولا بعرف اطبخ اصلا في نفس اليوم اللي بتبقي مخلصه فيه 3 طن بصل تقطيه في مطبخ بيتهم؟؟
11-طيب ليه الشباب بيصدقوهم؟
12-ليه لما تسال حد في اي كليه في اي جامعه وتقوله ايه اخبار الحريم في دفعتك يقولك كلهم غفر مفيش ولا واحده حلوه؟
13-طيب سؤال هيجنن كل الشباب ليه دايما البنات الحلوين بلاقيهم ماشيين مع شباب شبه علي الكسار ؟؟المقياس فس الحالات دي بيبقي ايه؟
14-ليه المصري لما يتحط في سيستم بيبقي ملتزم ومنظم زي المترو مثلا او لو سافر بلد تانيه؟وليه نفس الشخص في العادي بتاعه بيبقي ميعرفش يعني ايه التزام؟
15-ليه كل البنات قبل الجواز بيبقوا عصافير ماشيه علي الارض وبعد الجواز بيتحولوا لشوال قطن تخين التيله ؟
16-طيب رليه المصريين بيحبوا يلعبوا في مناخيرهم؟ايه الفايده يعني؟
17-ليه المصريين بيقولوا علي الفيسبوك فيس ده نوع من انواع الدلع يعني ولا مكسلين يكملوا الاسم ؟
18-ليه لما بنبقي داخلين اي امتحان بنبقي حاسين اننا محتاجين يوم زياده نراجع فيه؟
19-ليه ا يحد في موضع مسئوليه بيبقي شايف انه فوق النقد وان دي اهانه لشخصه لو حد راجعه؟
20-طيب ليه لما تسال حد علي مكان انت مش عارفه يقولك هوه قالك فين؟وغالبا بيتوهك في الاخر؟
21-ليه دايما محمود بكر بيحط نفسه في صراع وهمي فلسفي مع شخص تاني بيجادله طول الماتش وبيفرح في الاخر انه رد علي كل اسئلته وانتصر عليه؟؟
22-طيب ليه برضه هوه متخيل ان كل الناس بتشرب الشاي في البلكونه؟ليه متخيل ان كل الناس بتشرب شاي اصلا؟؟
23-ليه كليه التربيه بتاخد اقل من كليه الطب مع اني شايف انك تربي انسان وتبنيله عقله اهم مليون مره انك تعالجه لانه اكرمله انه يموت من انه يعيش جاهل ومتخلف؟
24-ليه واحنا في 2011 في ناس لما تيجي تعاكس تقول هوه فيه قمر بيطلع الصبح؟
25-ليه فتي احلام كل البنات رشدي اباظه في حين ان كل شاب له اكتر من 3 مليون فتي احلام؟؟
26-ليه احنا لسه مصممين ان الجو في مصر حار جاف صيفا دافئ ممطر شتاء مع انه مبقاش كده خلاص؟؟
يتبع
