احمــــــــــــــــــــــــــد

كان يوما حارا من ايام شهر مايو استيقظت كالعاده مرتديا ملابسي وحاملا رفيقه دربي علي ظهري ومتجها كالروبوت الي المواصلات حافظا طريقي ومنفذا لما افعله من سبع سنوات لذلك اصبح من النادر ان تجد شيئا يشد انتباهي فلم اعد اهتم باي مشاجره في طريقي مهما بلغت شدتها وعنفها كذلك لم يعد يسترعي انتباهي مرور فتاه جميله امامي او حتي عناوين الجرائد التي تنتشر في المترو صباح كل يوم حيث اصبح كل هذا بالنسبه لي مكررا ومعادا سئمته كله فقط اسير وافكربنظره زائغه بلهاء لا معني لها تشبه نظره عماد حمدي في فيلم ثرثره فوق النيل
دخلت الي العياده في ذلك المستشفي الجامعي المفترض انه وقور والذي يربض في مكانه منذ اكثر من 60 عاما متحديا الزمن وحاصدا ارواح الالاف بدلا من ان يكون منجيا لهم
لبست البالطو ودعوت الله -كعادتي-ان يعبر اليوم علي خير دعوتي هذه لم يكن مقصودا بها الا يموت او يتاذي احدا لانني طبيب اسنان والخطر قليل في هذا التخصص ولكن مغزي الدعوه هو ان يعبر هذا اليوم دون ان اتعامل مع ذلك الكائن المتقوقع والذي يدعي الغباءوالذي يسكن بنسبه غير قليله في عقول سكان بلدي مصر عامه وزائري هذا المستشفي بصفه خاصه وبالمناسبه لم تقبل هذه الدعوه في يوم من الايام ابداولم يعبر علي يوم الا وتعاملت معه من خلال الممرضه او الطبيب المشرف او المرضي والذين يعطونني كل يوم تاكيدا اننا لن نتقدم خطوه واحده للامام خلال القرن القادم
بعد حوالي ساعه من العمل دخل احمد -ازيك يا دكتور -اهلا ازيك عامل ايه؟ رددت بتلقائيه بحكم العاده وانا ارتدي قفازا جديدا والتقط ورقه كشف ادون عليها بياناته
-اسمك ايه - احمد   -كام سنه   -23 -23 خلي بالك انا عندي 24 سنه يعني اكبر منك بسنه بحالها يعني لازم تحترمني وضحكت وضحك احمد مش عارف علي اييييه؟دعابه سمجه جداااااا من ضمن عادتي في اطلاق الدعابات السمجه التي القيها علي المريض قبل الكشف لازاله الحاجز بيننا مما قد يسهل مهمتي الغريب في كل مره ان المريض يضحك علي تلك الدعابات مع انها لا تدعو ابدا للضحك ربما هي الطبيعه البشريه التي تجعل المريض دائما يتقبل تلك البواخه من الطبيب في سبيل ان يتخلص مما يؤرق حياته ويزعجه وهو الالم
-بتشتكي من ايه يا احمد  --مفيش يا دكتور ضرسي واجعني ليه كام يوم والظاهر انه محتاج يتخلع
-ورين كده يا احمد اه ده فعلا محتاج يتخلع كالمعتاد جهزت الادوات وبدات في اعطاؤه حقنه بالبنج وبعد اربع حقن بنج لا يزال احمد يحس بما افعله فعرفت السبب لانه ليس جديدا علي
-بقولك ايه يا احمد انت بتاخد اي ادويه
-لا خالص يا دكتور الحمد لله  -طيب من الاخر كده انت ليك في المخدرات(القيت السوال علي الرغم من تاكدي من الاجابه وانه-من شكله-  لسه ضارب جوب بره قبل ما يدخل)
-ايوه يا دكتور تفاريح كده ما انت عارف الحشيش مبقاش موجود (لا اعرف من اين اتي بتاكيد انني عارف انه مبقاش موجود ولكن ما علينا)
-طيب انت اخر مره شربت امتي - من اسبوعين  -يبقي انت اخدت حاجه تانيه من كام يوم
- اااااااه انا بصراحه اخدت امبارح ترامادول
-ده علشان تعمل دماغ يعني يا احمد ولا ايه -لا يا دكتور ده علشان المدام امبارح كان السبت بقي وكل سنه وانت طيب
سالته بدون ان اضحك-ايه يا احمد انا اعرف ان كل سنه وانت طيب دي بتتقال علي يوم الخميس هوه اتنقل ولا ايه
جاوبني وهو يضحك-ايه يا دكتور انت عايزنا نحتفل يوم الخميس بس ولا ايه هوه انت مش متجوز ولا خاطب؟ -اجبته وانا مش طايقه -لا متكلمين عليا
ووجدت احمد يضحك ضحكه حشاشين رنت في الدور كله ولو سمعها الطبيب المشرف لالغي امتيازي علي الفوروقتل احمد
-بص يا عم احمد انا عايز افهمك حاجهالبنج عمره ما هياثر فيك علشان الترامادول مخدر قوي جدا وبيخلي الخلايا مش بتستجيب للبنج (وجدت البلاهه ترسم علي وجهه ونظرته كلها علامات استفهام فتوقفت وسالته) -انت عارف يعني ايه خلايا
فاجاب ببراعه العالم بخبايا الامور -ايوه يا دكتور دي حاجه كده زي الحيوانات المنويه هوه انا جاهل ولا ايه؟؟
فقلت له وقد فاض بي الكيل منه -يا ابني سيبك من مراتك وبطل تفكر بنصك التحتاني 4 دقايق بس وافهمني علشان في غيرك بره .ومن العصبيه نسيت انا كنت بقول ايه فقلت له انا كنت بقولك ايه ؟
فرد ببراءه-الحيوانات المنويه
فوجدت نفسي اهز راسي باسي واقول له مفيشش فايده المهم يا احمد لو هتيجي اخلعلك بعد كده ابقي تعالي مبطل الترامادول او اي برشلم قبلها ب 4 ايام علي الاقل
-بس ده كتير اربع ايام يا دكتور ده كده المدام تزعل .فوجدت نفسي امد يدي مسلما عليه ومنعت نفسي من ان امدها علي وشه -انا قلتلك وخلاص مع السلامه يا ابو حميد
وقام احمد من علي الكرسي وراقبته وهو يمشي لاجد قدميه غير قادره علي حمله وركبتيه في حاله سلام دائم علي بعضها وناديت عليه قبل ان يخرج من الباب اثناء خلعي للقفاز -احمد   - نعم يا دكتور
--ابقي سلملي علي المدام وخليها تاخد بالها من صحتك شويه .فضجك ضحكه خفيفه وهو يقول -حاضر يا دكتور
وضحكت انا محركا راسي وانا انادي علي الممرضه اللي بعده ....