ملحوظه: كاتب المقال اصلا دكتور فبلاش نزايد علي بعض انت لست اكثر مني دكتره
اولا كده لازم نحط تعريف لكلمه دكتور علشان نعرف بالظبط نوع الكائن الحي اللي بنتكلم عنه الدكتور ده هو كائن انوي نادر يمثل امتداد لفصيله من الفصائل الوسطي بين الانسان والقرود نظرا لانه يحمل شكل الانسان بس غالبا من تانيه ثانوي لحد لما يخلص الكليه بيعمل قرد علشان يشيل لقب دكتور وبعد كده بقي بيبقي اتعود علي حياه القرود وبيستحلاها لدرجه ان شعاره بيبقي القردنه اسلوب حياه فبيكمل باقي حياته بنفس الاسلوب
في تعريف تاني بيقول ان الدكتور كائن اهبل بيبيع سنين عمره وصحته في سبيل ان عم خميس الفكهاني يقوله خلي يا دكتور في وسط ناس كتير واقفه وهوا بيشتري منه كيلو موز هوا اصلا ضحك عليه في تمنه بس مش مشكله بيدفع وهوا منشكح في سبيل كلمه دكتور دفع فيها سنين عمره هيستخسر يدفع فيها 3 جنيه زياده في كيلو موز
المهم بقي كلامي دلوقتي للبنات الي علي وش جواز اللي اتجوزوا دكاتره دول لاص لبسوا في الحيط وهيفهموا كلامي كويس اوي وهياخدوا تنهيده حاره وهيطلعوها وهما بيقولوا (انت كنت فين من زمان كنت تعالي وعيني بل ما البس اللبسه السودا دي )
الي كل بنت مش متجوزه لو مامتك او خالتك او اي حد من جيرانك اللزجه جالك وقالك انه جايبلك عريس وفضل يعد مميزاته وفجاه في وسط الكلام كده سمعتي كلمه دكتور قال يعني دي من ضمن المميزات اللي بتتعد لازم تقاطعي اللي بيكلمك ده ايا كان اما لو كان اللي بيكلمك ده مامتكومش هينفع تقاطعيها علشان كلام الناس انزلي بسرعه بوسي علي ايدها ورجلها وقوليلها (ليه يا ماما عايزه ترميني الرميه المهببه دي كل ده علشان مش عايزاكي تحطي من المانيكير الدارك ريد الاوريفلام بتاعي خديه كله ياماما بس باش دكتور انا بنتك برضه )
شايف بقي دلوقتي كام بنت بدات تستغرب والفضول يشتغل معاهم وبداوا يسالوا السوال الوجودي الشهير وليه الدكتور لا؟؟اقولك يا ستي ليه الدكتور لا بس لا تنسيني من وافر الدعاء واذا لم تدعي فاعلمي ان ذنوبك منعتك وانك هتلبسي في دكتور
يا تري ممكن تستنوا ايه من واحد قضي اكتر من 9 سنين من حياته منفرد مع الكتاب بتاعه والشيطان ثالثهما ؟؟ اكيد هتنشا بينهم علاقه محرمه مش هينفع اقول تفاصيلها علشان الرقابه هتشيل كل التفاصيل دي
خلال التسع سنين دول اتحداكي اذا كان ممكن علي سي الدكتور انه يصاحب او يعرف او حتي يفكر يعرف بنت الا اذا كانت صاحبته في السكشن وبتاخد معاه نفس الدروس علشان دي الاماكن الوحيده اللي ممكن يتقابلوا فيها وغالبا لما بيقفوا مع بعض يتكلموا بيتكلموا في الطب الحديث وعلاقته بتجفيف الباميه والمواد الرخمه والصعبه جدا والامتحانات السنه دي وهل هتتزامن مع خسوف القمر ولا هتقلش منه وهكذا من الاخر كده مش هيقولك كلمه حلوه ولا هيدلعك بعد اللي اتعمل فيه طول التسع سنين دول لان الحاجه الوحيده اللي بيعرف يدلعها هي كتبه وملازمه
شايف كده بنوته بريئه بتبص بصه انثويه وبتضحك ضحكه رقيعه وبتقول (وماله نعلمه ياخويا واهو نضمن انه خام ونشكله علي مزاجنا وكله بثوابه ) احب اقول لحضرتك ان الدكتور شخص غير قابل للتشكيل يعني انا ممكن اتنازل عن اللقب اللي دفعت فيه سنين من عمري مقابل تحدي بسيط لو عرفتي تخليه يقول بحبك وعايز اتجوزك بطريقه طبيعيه وتحسيها كده مش بطريقه تسميعه لاعراض مرض الدوسنتاريا الاميبيه لدكتور رخم في امتحان شفوي مسهره يومين من غير نوم علشان يخلص من الامتحان ومن رخامه الدكتور ويروح يحضن مخدته اللي بتعاني معاه من سنين وينام ساعتين علشان يصحي يذاكر الماده اللي بعدها
تاني حاجه الدكتور ده كائن مشاعره ماتت من زمان اوي انك تلاقي دكتور عنده مشاعر دي حاجه زي بالظبط ما تلاقي اخواني بيفهم لان ببساطه الدكتور ولا بيخاف ولا بيقلق ولا بيحب ولا بيكره ولا بيغير ولا اي حاجه من دي بطل كل ده من زمان رد فعله دايما هتلاقيه ثابت ماسك فيس محترم وكلمه واحده لكل المواقف (كله هيبقي تمام ) مستنين ايه من واحد الناس بتموت قدامه في الاستقبال كل يوم من وهوا عنده 23 سنه والشباب زممايله بتوع تجاره انجليش واداب عبري محتارين يخرجوا النهارده في فرايدايز ولا تاماراي تفتكري هيراعي اوي لو انتي مصدعه او مزاجك مش رايق او قلقانه حبتين ياراجل كبر مخك
حاجه كمان متستغربيش لو لقيتيه بيسمع منهج الانف والاذن بالليل وهوا نايم او بيجيلاه هلاوس انه في امتحان جراحه شفوي والدكتور بيحط عليه او مثلا تبقوا بتتكلموا واخيرا لقيتي وقت فاضي انكوا تبقوا لوحدكم واخيرا الحجر نطق وفجاه تلاقيه فصل منك وبدا يسمع اعراض التهاب الخلايا المبطنه للعصب الحائر لانه هيناقش الماستر بتاه اللي في الموضوع ده بعد كام يوم ارجوكي كل ده عادي وبلاش استغراب
بالنسبه بقي للكلام بتاع ان الدكاتره بيبقي عندهم 5 عين وعزبه وعربيه والكلام الجميل ده احب اقولكم كلمه واحده الصيت ولا الغني اصل واحد بيقبض 850 جنيه وبياخد بدل عدةي 15 جنيه وهوا موحول ف الدم طول اليوم وهيجيب كل ده منين يادوب دول بيكفوا السجاير والقهوه وبيتفضل 50 جنيه اخر كل شهر دول بيوفرهم علشان يبتدي يبني مستقبله بقي ويتجوز ويتمتع بحياته بقي
اما بقي المركز الاجتماعي فدي حاجه الدكتور بيرضي بيها غوره علشان يحس ان عمره مضاعش هدر يعني اهم حاجه في حياته اللقب والبالطو الابيض اللي بيستمد منه هيبته زي بالظبط الظابط الي بيستمد هيبته من بدلته محاوله يائسه منه انه يقنع نفسه انه موجود وعايش ومهم
الموضوع كان في اوله هزار بس اسف قلب جد ودمه بقي تقيل اوي لقيت مشاكلي اللي تاعباني دلوقتي بتطلع غصب عني لقيت سهر ليالي كتير وتعب ةقلق وخوف بيتجسد علي الورق دلوقتي من غير ماخد اي مقابل لكل الي عشته ده افتكرت حاجات كتير جيت فيها علينفسي وايام ومواقف كتير استحملت فيها فوق طاقتي لقيتها بتكلمني دلوقتي وتطلعلي لسانها وتقولي (ضحكت عليك واخدت منك الحلو وانت ماخدتشس قدام كل ده اي حاجه)
ياجماعه انا ضحكت عليكم الدكتور ده اطيب انسان في الدنيا لمسه حنان تدوبه كلمه حلوه ترجعه تاني للحياه شويه اهتمام صغيرين ممكن يبيع شهادات والقاب الدنيا علشانهم
اللي يجيلها دكتور شايل كل المسئوليه دي ومستحمل كل القرف ده وترفضه تبقي غلطانه واسف يا دكاتره علي العنوان وعلي الكلام اللي جوا المقال واسف اكتر علي حالنا اللي بقي كده
هختم ببيت شعر هتلاقوا كل دكتور حافظه ومكتوب في الملزمه بتاعته
ساصبر حتي يعجز الصبر عن صبري ساصبر حتي ينظر الله في امري
ليست هناك تعليقات:
إرسال تعليق